Иккинчиси: Бишкек иссиқлик электр марказида яна ҳалокат юз берди. Икки-уч кун чидаш керак
Портлашдан сўнг шаҳарликлар иссиқ сувсиз қолиб, мактаб ва боғчалар онлайн таълимга ўтказилди.
Бугун, 2 феврал эрталаб одатдагидай уйғонган Бишкек аҳолиси иссиқ сувсиз қолганини билди. Иссиқлик батареялари ҳам совиб қолган эди. Дарҳол вазиятни билиш учун қўнғироқлар, смс ёзишмалар бошланди. Тез орада шаҳарни иссиқ сув ва қисман электр энергияси билан таъминловчи Иссиқлик электр марказида (ИТМ) ҳалокат юз бергани маълум бўлди.
Кўп ўтмай, Энергетика вазирлиги бу хабарни тасдиқлади. Тонгга яқин соат 3.00 да иншоотда кучли портлаш юз бергани айтилди. Унинг кучлилигидан бир неча юз метр нарида жойлашган уйларнинг деразалари ҳам зириллаб кетган. Уй эгалари кучли гумбурлаган овозни ҳам эшитишган. Юз метрча наридаги чорраҳада жойлашган видео камеранинг ИТМ томоннинг кучли ёришиб кетганини акс эттирган тасвири интернетда тарқалди.
Портлашнинг сабаби ноъмалум. Ҳозирча қозонларнинг бири портлаб кетгани тахмин қилинмоқда. Ҳалокат оқибатида ИТМ ходимларидан беш киши жабрланган, уларнинг иккитаси кучли даражада куйган ва оғир аҳволда реанимацияда ётишибди. Биттасининг аҳволи ўртача оғирликда деб баҳоланмоқда. Икки киши эса аҳволи яхши бўлгани боис касалхонага ётишдан бош тортишган.
Жабрланганларнинг 22, 23, 33, 34, 35 ёшда экани маълум бўлди. Расмийлар вазиятни тиклаш учун 2-3 кун керак бўлишини айтишди. Шу кунларда Бишкекда кечалари 9 даражагача совуқ бўлиши кутилмоқда.
Вазиятни ўрганиб, ҳалокат оқибатларини бартараф этишни мувофиқлаштириш учун махсус штаб тузилди. Вазирлар маҳкамаси раиси Ақилбек Жапаров ҳалокат сабабли Қозоғистонга қилган ташрифини тўхтатиб, зудлик билан Бишкекка қайтган. У келиши билан президент Садир Жапаров иштирокида йиғилиш ўтказилиши кутилмоқда.
Соғлиқни сақлаш вазирлиги режалаштирилган амалиётларни бекор қилишга мажбур бўлган. Вазир Алимқадир Бейшеналиевнинг айтишича, ҳозирча оғир аҳволда келган хасталаргагина амалиёт ўтказилади.
Воқеа сабаб шаҳарнинг барча мактаблари ва болалар боғчалари ойлайн таълимга ўтказилди. Бу ҳақда ота-оналарга қисқа хабарлар орқали билдирилди.
Афсуски, бу яқин 5-10 йилда иншоотда юз берган биринчи ҳалокат эмас.
Эслатиб ўтамиз, 2018 йилнинг январида ҳам ИТМда кучли портлаш юз бериб, қишнинг роса совуқ кунлари шаҳар аҳолиси бир неча кун иссиқликсиз қолган. Оқибатда ИТМ раҳбари ва қатор йирик амалдорлар ишдан бўшатилган. Кейинроқ жиноий иш қўзғалиб, ўн нафардан кўпроқ амалдорлар қамоққа олинган.
Текширишлар давомида ИТМ таъмири учун Хитойдан олинган 386 миллион долларлик қарзнинг катта қисми амалдорлар тарафидан ўзлаштириб юборилгани, керакли жиҳоз ва асбоб-ускуналар ҳаддан ортиқ катта нархда олингандек расмийлаштирилган ҳужжатлар борлиги маълум бўлган. Жумладан, битта оддий қисқичнинг 200 доллар нархда олинди, деб расмийлаштирилгани маълум бўлган.
Узоқ давом этган суд жараёнидан кейин амалдорлар 2 йилдан 8 йилгача қамоқ жазосига ҳукм қилинган. Давлатга етказилган зарарни қоплаш мақсадида судланганларнинг кўпчилиги катта ўлчамда жаримага ҳам тортилган.
Жиноий ишга тортилган бўлмаса ҳам, жиддий айбловлар ўша пайтдаги президент Алмазбек Атамбаевга ва бош вазил Жантўрў Сатибалдиевга ҳам қўйилган. Кейинроқ Атамбаев ўзини ва ўзи тайинлаган амалдорларни оқлаб, аввал ўтказилган ИТМ таъмири туфайли Бишкекда юз берганидан ҳам каттароқ ҳалокатнинг олди олинганини, бу шарафли ишни бажарганлар эса қамоққа ўтирганини айтиб чиққан.
Мутахассислар Бишкек ИТМнинг бундан 60 йиллар аввал қурилиб, унинг биноси ва жиҳозлари аллақачон ўз хизмат даврини ўтаб бўлганини айтишади.
Оқбура, Бишкек.
Расм интернетдан олинди.
